Новости

ҮНҮСТҮҮККЭ БЭЙЭНИ САЛАЙЫНЫЫ КҮНЭ

  • 8 Октября 2018
  • 513

ҮНҮСТҮҮККЭ БЭЙЭНИ САЛАЙЫНЫЫ КҮНЭ

Биһиги үнүбэрсиэппитигэр Учуутал күнүгэр сылын ахсын бэйэни салайыныы күнэ ыытыллар. Үнүстүүппүтүгэр бу тэрээһин хайдах ааспытын кылгастык сырдатабыт.

 

Дмитрий Горохов, сервис уонна туризм хаапыдыратын 4 кууруһун устудьуона:

- Мин урут иккитэ (2016, 2017 сс.) бэйэни салайыныы күнүгэр дириэктэри иитэр үлэҕэ солбуйааччы дуоһунаһын толорбутум, оттон быйыл, 2018 сылга, бүтүн үнүстүүт салайааччыта буоллум. Уопуттаах буоламмын, бүгүҥҥү күн ыарахана суохтук ааста. Мин санаабар, биhиги үлэбитин үчүгэйдик оҥордубут, туох да улахан кыһалҕаны көрсүбэтибит. Дириэктэрбит Торотоев Гаврил Григорьевич сорудаҕын этэҥҥэ толордубут. Кэлэктииппэр эппиэтинэстээх, үлэҕэ көхтөөх көмөлөһөөччүлэрдээхпиттэн үөрдүм. Отчуот диэн элбэх эбит, кылгас бэриэмэҕэ барытын оҥоруохтааххын, ол эрэн бу үлэ эн хайдах салайааччы буоларгын көрдөрөр. Салайааччы киһи эппиэтинэстээх, тэрээһиннээх буолуохтаах дии саныыбын, уонна, кылаабынайа, үлэлиир баҕа баар буолуохтаах.

 

Айна Бурнашева, культурология хаапыдыратын 4 кууруһун устудьуона:

- Бэйэни салайыныы күнүгэр хаапыдыра сэбиэдэссэйин эбээһинэһин толоро сылдьабын. Ону таһынан үһүс уонна төрдүс куурус устудьуоннара хаапыдырабыт учууталларын оннугар уруоктары ыыталлар: Марк Николаевич Егоровы – Сардаана Бочкарева, Виктор Данилович Михайловы - Таня Корякина, Семен Семенович Протопоповы – Любомир Никифоров, Лена Алексеевна Сидорованы - Никита Пономарев, Кира Торговкина. “Уһуйааччыларбыт” үлэлэригэр эппиэтнэстээхтик сыһыаннаһан, дьарыктарын бэркэ ыыттылар. Хаапыдыра сэбиэдэссэйэ буолар олус ыарахан уонна эппиэтинэстээх үлэ дии санаатым. Ол эрэн киһи үлэлиир үлэтэ эбит.

 

Сергей Нафанаилов, Н.С. Григорьев аатынан саха тылын хаапыдыратын саха салаатын 2-с кууруһун устудьуона:

- Аҕыйах чаас да буоллар, Дария Ивановна Чиркоеваны солбуйбуппуттан олус үөрэбин. Бэйэм ХИНТуоКИ устудьуоннар идэлээх сойуустарын салайааччытын солбуйааччытабын, ол иһин салайар үлэни билэбин. Өскөтүн хаапыдыра үлэтэ барыта официальнайдык ааһар эбит буоллаҕына, устудьуоннар идэлээх сойуустарыгар бэйэ көрүүтүнэн үлэлиибит. Тэҥнээн көрдөххө, научнай өттүнэн үлэлэһии, салайыы ыарахан курдук буолан тахсар. Бэйэни салайыныы күнэ инники идэбитигэр холонон көрөрбүтүгэр олус үчүгэй үөрэх буолар. Бу күҥҥэ салайар үлэ араастааҕын бэлиэтээтим, уопут ыллым.

 

Саха тылын истилиистикэтин уонна нууччалыы-сахалыы тылбаас хаапыдыратын сэбиэдиссэйин, Евдокия Софроновна Герасимованы, иккис куурус маҕыстыраана Олесова Мария үтүө суобастаахтык солбуйда:

“- Биһиги хаапыдырабытыгар икки кыыс уһуйааччыларын солбуйан, учуутал буоларга холоннулар. 4 куурус устудьуона Бурцева Алина Манчурина Лидия Егоровна «Русско-якутский перевод» дьиссипилиинэтин ыытта. Оттон Лукачевская Лилиана РЯП-17 бөлөх устудьуона «Введение в теорию коммуникации» Васильева Акулина Александровна оннугар уруок биэрдэ.

 

Фольклор хаапыдыратын сэбиэдиссэйин, Василий Васильевич Илларионовы, НХК-15 бөлөх устудьуона Семенова Снежана солбуйда:

- Устудьуоннарбыт учуутал күнүгэр бэйэлэрин уһуйааччыларын солбуйан олус үчүгэйдик үлэлээтилэр. Мин бэйэни салайыныы күнүгэр хаапыдыра сэбиэдиссэйинэн иккис сылбын үлэлээтим. Бу олус эппиэтинэстээх, ол эрэн киһи үлэлиэн сөптөөх дуоһунаһа эбит дии санаатым.

 

Уһуйааччылары солбуйбут устудьуоннар санаалара

 

Артём Шарин, саха-английскай салаа иккис кууруһун устудьуона, Матрена Петровна Попованы солбуйан, саха-английскай салаа иккис кууруһун устудьуоннарыгар «История родной литературы» диэн уруогу үөрэппит. И.М.Гоголев – Кындыл «Хара кыталык» романын кытта билсэ сылдьаллар эбит. Устудьуоннар олуһун диэн сэргээн ааҕаллар, ырытыһаллар.

Артём Шарин: «Учуутал оруолугар бастакы холунуум буолар. Оҕолор болҕойон истэр, интэриэһиргиир буоланнар, үөрэтэргэ уустуга суох эбит».

 

Джулустан Кононов, литературнай айар үлэһит иккис кууруһун устудьуона, Иван Юрьевич Васильевы солбуйда: «Учуутал буолар олус интэриэһинэй эбит диэн бастакы кууруска билбитим, ол иһин быйыл эмиэ солбуйдум. Бэйэм үөрэнэр бөлөҕүм оҕолоро буолан, үлэлэһэргэ судургу. Ол да буоллар, үөрэтэр матырыйаалым нууччалыы буолан, сахалыы тылбаастаан быһаарарбар кыра уустуктары көрүстүм».

 

Торговкина Кира СП-16 бөлөх устудьуона: “Мин бүгүн бэйэм бөлөҕүм оҕолоругар «Теория культуры» Лена Алексеевна Сидорова дьиссипилиинэтин үөрэттим. Устудьуоннарбар «Концепция Фридриха Ницше» тиэмэҕэ лиэксийэ аахтым. Олус интэриэһинэй паара ааста. Учууталлыырга бу мин бастакы холонуум буолар. Уопсайынан, преподаватель бары өттүнэн элбэх билиилээх-көрүүлээх, үлэтигэр эппиэтинэстээх, муударай өйдөөх-санаалаах буолуохтаах дии саныыбын. Ону таһынан устудьуоҥҥа холобур буолар, интэриэһинэй, сайдыылаах личность буолуохтаах. Оскуола саҕаттан учуутал идэтин интэриэһиргиир этим. Бүгүн ол санаабын өссө төгүл бигэргэттим. Инникитин учуутал идэтин баһылыам диэн эрэлим улаатта”.

         Алена Санникова, саха литературатын хаапыдыратын М-ТЛК-17 маҕыстыраана: “Мин Литературнай үлэһит салаа 3 кууруһун устудьуоннарыгар Григорьева Людмила Павловна “Литературнай эрэдээксийэлээһин” предметигэр дьарык ыыттым. “Издательский процесс” диэн тиэмэни кэпсээтим. Устудьуоннар редакторскай практиканы барбыттар, бэчээт эйгэтин үлэтин кытта билсибиттэр, көхтөөхтөр. Бэчээт эйгэтин, литература туһунан тус санааларын, көрүүлэрин этэллэр. Устудьуоннарга дьарык ыыппыппын сөбүлээтим”.

Автор: «Ийэ тыл» пресс-киин

Разрешено копирование статей, только при наличии активной (кликабельной) ссылки на страницу-источник сайта Северо-Восточного федерального университета. Ссылка должна находиться непосредственно рядом с материалом, должна быть видимой и прямой (без использования java-скриптов).