Балаҕан ыйын 22 күнүгэр «Россия-моя история» мультимедийнай историческай пааркаҕа 6-с сылын ыытыллар Бүтүн Арассыыйатааҕы Наука бэстибээлэ буолан ааста. Хас эмэ тыһыынчанан көрөөччү кыралыын, улаханныын бу тэрээһиҥҥэ кэлэн элбэҕи билэн-көрөн бардылар.

Биһиги үнүстүүт бары олус көхтөөхтүк кыттан, ситиһиилээх түмүктэри көрдөрдүбүт. Ол курдук, барыта аҕыс былаһаакка баара.

1.     Саха тылын хаапыдырата бу тэрээһиҥҥэ «Тыл оонньуута» диэн түһүлгэнэн кытынна. Манна устудьуоннар кэлбит ыалдьыттарга саха тылыгар, литературатыгар анаммыт викторина оонньоттулар уонна былыргы түүр руническай суругун кытта билиһиннэрдилэр, тааска суруйтаран бэлэх туттаран ыыттылар.

2.     Фольклор хаапыдырата фольклорга аналлаах маастар кылаастары ыытта, быыстапка көрдөрдүлэр. Ону таһынан манна кэлбит ыалдьыттар «Саха норуотун үгэһэ» диэн фотозонаҕа хаартыскаҕа түһэннэр, бэйэлэригэр өйдөбүнньүк хааллардылар.

3.     Методика хаапыдырата эмиэ араас маастар кылаастары ыытта. Сиэл да өрдүлэр, оҕуруо да тистилэр, сиэр-туом, олоҥхо толоруутугар интэриэһинэй маастар кылаас ыытылынна.

4.     Саха литературатын хаапыдырата «Литературная Якутия» диэн түһүлгэнэн кытынна. «Суруйааччы остуола» П.А. Ойуунускай төрөөбүтэ 125 сылыгар аналлаах фотозонаҕа ким баҕалаах хаартыскаҕа түстэ, Ойуунускайга анаан сурук суруйдулар. Аспирант Рустам Каженкин «Литературнай лото» диэн авторскай оонньуутун билиһиннэрдэ уонна устудьуоннар «Саха литературата» диэн 10 барыйааннаах сэргэх оонньууну ыыттылар.

5.     Хотугу билэлиэгийэ хаапыдырата кумааҕынан уонна түүлээхтэн хотугу норуоттар оонньуурдарын оҥорорго маастар кылаас көрдөрдүлэр. Ону таһынан, хотугу норуоттар декоративнай-прикладной айар үлэлэрин көрдөрөр быыстапка баара. Ким баҕалаах хотугу таҥас кэтэн өйдөбүнньүккэ хаартыскаҕа түстэ.

6.     Култуура хаапыдырата кэлбит ыалдьыттарга сахалыы харысхаллары оҥорорго маастар кылаас көрдөрдө.

7.     Саха тылын истилиистикэтин уонна нууччалыы-сахалыы тылбаас хаапыдырата тылбааска сыһыаннаах оонньуулары ыытта. Ыалдьыттар тылбаас өттүгэр бэйэлэрин тургутан көрдүлэр.

8.     Сервис уонна туризм хаапыдырата «Мин Сахам сирэ» интерактивнай оонньуу бэлэмнээбит, баттах өрүүгэ уонна мейкапка маастар кылаастары көрдөрдө.

Бэстибээл түмүгүнэн биһиги үнүстүүппүт маннык хайысхаларга бэлиэтэннэ: педхайысха - 1 бочуоттаах миэстэни ылла, 2 миэстэни гуманитарнай хайысхаҕа «Тыл оонньуута» ылла. Сервис уонна туризм хаапыдыратын «Клуб путешественников» экспозицията «Саамай творческай» диэн номинацияны ылан үөрүүбүт үрдээтэ. Кыайыылаахтары уонна Бэстибээл бука бары кыттыылаахтарын истиҥник эҕэрдэлиибит!