Үнүстүүккэ бэйэни салайыныы күнэ

Алтынньы 5 күнэ – Аан дойду үрдүнэн учуутал күнэ. Ол чэрчитинэн биһиги үнүбэрсиэппитигэр сылын аайы үрдүкү куурус устудьуоннара уһуйааччыларын биир күҥҥэ солбуйаллар. Быйыл даҕаны бу күн оҕолорго бэйэни салайыныы күнүн быһыытынан ааста.

Биһиги үнүстүүппүт устудьуоннара эмиэ учуутал оруолугар киирэн, эппиэтинэстээх үлэни толордулар. Ол курдук үнүстүүт дириэктэринэн ПО-МХК-15 бөлөх устудьуона Прокопий Софронеев, дириэктэри үөрэх чааһыгар солбуйааччынан ТОТТУ-16 бөлөх устудьуона Сергей Кириллин уонна иитэр үлэ чааһыгар солбуйааччынан СП-15 Дмитрий Горохов үтүө суобастаахтык үлэлээтилэр.

Бэйэни салайыныы күнэ хайдах ааспытын “дириэктэртэн” Прокопий Софронеевтан сурастыбыт.

Прокопий Софронеев: “Бүгүн устудьуоннар учуутал эбээһинэһин ылынан, паараларбытын бэйэбит ыыттыбыт. Үөрэх күнэ олус үчүгэйдик ааста. Хас биирдии устудьуон манна эппиэтинэстээхтик сыһыаннаһан, көтүппэккэ, үөрэ-көтө үөрэннэ. Хаапыдыралар “сэбиэдиссэйдэрэ”, ону кытта “учууталлар” туох баар сыраларын ууран туран таһаарыылаахтык үлэлээбиттэрин хайҕыахпытын эрэ сөп. Түмүктээн эттэххэ, бэйэни салайыныы күнэ биһиги үнүстүүппүтүгэр бэртээхэйдик ааста”.

Күндү уһуйааччыларбыт! Учуутал үлэтэ диэн, биллэн турар, олус түбүктээх, улахан эппиэтинэстээх үлэ. Эһиги биэрэр билиигит, сүбэҕит-амаҕыт хас биирдиибит олоҕор олус туһалаах буолар. Онон эһигини идэлээх бырааһынньыккытынан ис сүрэхпититтэн эҕэрдэлиибит уонна кыһамньылаах үлэҕит иһин махтанабыт!

Бараммат-хороммот 
Банаардаах-сырдыктаах 
Баҕабын толорор

Бастыҥныыр атаспар, 

Ааҕаммын айхаллыыр

Дьоллордоох тускуга 

Угуйан үөрэппит

Учуутал убайбар

Эдэрдиир бэйэкэм

Эрчимнээх сүрэхтэн,

Эрэйи чэпчэтэр

Эҕэрдэ ыытабын!