Институт языков и культуры народов СВ РФ

 

Ломоносов-2017 уонна МНСК-2017 кэмпириэнсийэлэр тустарынан оҕолор санаалара

27 Апреля 2017

Быйыл биһиги үнүстүүппүтүттэн дойдубут тэбэр сүрэҕэр Москуба куоракка буолан ааспыт «Ломоносов-2017» аан дойду таһымнаах кэмпириэнсийэҕэ 18 оҕо ситиһиилээхтик кыттан кэллэ. Онтон Новосибирскай куоракка буолан ааспыт “МНСК” аан дойдутааҕы кэмпириэнсийэҕэ 7 оҕо. Оҕолор санааларын истиэххэ:

 Муус устар 10-21 күннэригэр Москваҕа уонна Новосибирскайга буолан ааспыт Аан дойдутааҕы "Ломоносов-2017" уонна "МНСК-2017" кэнпириэнсийэлэргэ кыттан кэллим. "Ломоносов-2017" кэнпириэнсийэҕэ ситиһиилээхтик кытынным, үлэм үс бастыҥ иһигэр киирдэ. Бэйэм көрүүбүнэн, манна буолар Өрөспүүбүлүкэ, Арассыыйа таһымнаах кэнпириэнсийэлэртэн улахан уратыта суох. Ол гынан баран нуучча оҕолоро үлэлэрин хайдах кэпсииллэрэ олох атын эбит. Хайдах туттан-хаптан, саҥаран-иҥэрэн үлэҕин билиһиннэрэргиттэн элбэх тутулуктаах. Онон бу өттүгэр бэйэбэр бэлиэтэниилэри оҥордум. Сылдьыбыппыт тухары тымныы, тыаллаах күннэр турбуттара, ардах, хаар түспүтэ. Новосибирскайга бастакыбын бара сырыттым. Улахан соҕус, ол гынан баран бэйэтигэр тардар куорат эбит. Дьокуускайга сылдьар курдук этим. Маннык сырыылар устудьуон билим өттүнэн сайдарыгар олус наадалар дии саныыбын. Бэйэм баран кэлбиппиттэн олус астынабын уонна өссө барбыт киһи диэн баҕа санааланным. АЛИНА БУРЦЕВА

 Сылын ахсын Москваҕа "Ломоносов-2017", Новосибирскайга "МНСК-2017" ыытыллар кэмпириэнсийэлэргэ кыттан, уопут ылан кэллибит. Москваҕа кыттан МГУ билим сурунаалыгар бэчээттэнэргэ мэктиэ сурук туттум. Атын устудьуоннар үлэлэрин билсэн, ыйытылаһан билиибит хаҥаата. Бастакы кэмпириэнсийэбит "Ломоносов" этэ. Москва куорат тигинээн улахана, дьоно тургэттэрэ сүрдээх. Маҥнайгы күммүт Москва куорат иһигэр мунууттан саҕаламмыта, ол да буоллар син уҥа-хаҥас бэрсэн сырыттыбыт. Болдьохтоох сирбитигэр метронан уонна сатыы тиийэбит. Олус да элбэҕи хаампыппыт. Биир күн 27 км хаампыппытын күн бүгүҥҥэ дылы бэйэбит да итэҕэйбэккэ сылдьабыт. Иллэҥ кэммитигэр библиотекаҕа сылдьан үлэбитигэр аналлаах матырыйаал хомуйдубут, куорат устун күүлэйдээн, дуоһуйа сынньанан кэллибит. АННА ЗАХАРОВА

 Үнүстүүппүттүттэн 20-чэ оҕо буолан Москуба уонна Новосибирск куоракка норуоттар икки ардыларынааҕы билим кэмпириэнсийэҕэ кыттан кэллибит.  Икки нэдиэлэ барыыбытыгар элбэх мүччүргэннээх сырыыларбыт биһиги өйбүтүгэр-санаабытыгар кэрэ бэлиэ курдук иҥэн хааллаҕа. Мин, бииргэ үөрэнэр уолум Гурьев Саша, атын бөлөхтөн Захарова Аня, Рахлеева Валя уонна Шестакова Полина буолан Москуба куоракка биир хостелга түһэн, биир нэдиэлэ иһигэр биир уопсай тыл булан көрдөөх-күлүүлээх түгэҥҥэ түбэһэн, ини бии дьүөгэлии буолан олордубут, билигин кыргыттар саныы саныы күлсэбит.  "Ломоносов" кэмпириэнсийэҕэ бастакыбын кыттабын, маны таһынан Москуба да куоракка бастак сырыым буолар. Москуба куораты олус диэн сөбүлээтим, кини киэҥэ, элбэх дьон саҥата, улахан дыбарыас курдук дьиэлэрэ, барыта олус кэрэ хартыына буолан көстөр, киһи күнэ-дьыла биллибэккэ эрэ ааһар. Кэмпириэнсийэтэ улахан тэрээһиннээхтик ааста, улууссаҕа тиийэ халыҥ уочарат, араас куораттан оҕо бөҕө кэлэн кыттыннылар, сүрүн кытай норуотуттан кытары тиийэ. Оҕолор үлэлэрэ олус интэриэһинэй, туох баар эйгэттэн ылан хасыһан, чинчийэн, дириҥэтэн ырыппыт үлэлэрин дьүүллүүр сүбэҕэ билиһиннэрдилэр. Новосибирск куоракка кыргыттарбынаан эмиэ бииргэ олорбуппут. Новосибирск куорат Москубатааҕар чуумпу. Кэмпириэнсийэҕэ былырыыҥҥыннан тэҥнээтэххэ, быйыл кыттааччылар элбэхтэр. Уопсайынан эттэххэ, төһө да миэстэлэспэтэҕим үрдүнэн, бу икки нэдиэлэ баран кэлии, миэхэ саҥа күүһү-уоҕу, элбэх идеяны ону тэҥэ истиҥ иһирэх дьүөгэлэри бэлэхтээтэ. САРДААНА ДАНИЛОВА

 27-с төгүлүн ыытыллар "Ломоносов" кэмпириэнсийэ5э быйыл бастакыбын кытынным. "Лингвистика; Азия уонна Африка тыллара" диэн сиэксийэ5э үһүс мэндиэмэннээх диплом тутан олус үөрэн, сүргэм көтө5үллэн кэллим. Маннык үрдүк таһымнаах кэмпириэнсийэ5э кыттан, атын устудьуоннар үлэлэрин билсэн бэйэм туспар элбэх саңаны биллим, уопут ылынным. 

Иллэң кэммитигэр Москва куорат биллэр-көстөр сирдэринэн күүлэйдээтибит. Ол курдук, Кыһыл Болуоссакка, Ленин аатынан библиотека5а, Храм Христа Спасителя, ВДНХ, Останкино телебашня5а, Москвариумңа сылдьан дуоһуйа сынньанныбыт.
Бу сырыы миэхэ саңа билсиһиилэри, до5оттору, умнуллубат түгэннэри бэлэхтээтэ. Эһиил эмиэ кыттар ба5а саннаалаах төнүннүм. ПОЛИНА ШЕСТАКОВА

 Бу ый 10-21 күннэригэр ХИФУ устудьуоннара Москва уонна Новосибирск куораттарга сылын аайы ыытыллар Аан дойдутааҕы кэмпириэнсийэлэргэ ситиһиилээхтик кыттан кэллибит.

Мин иккис сылбын XXIV төгүлүн ыытыллар аан дойдутааҕы “Ломоносов-2017” кэмпириэнсийэҕэ кытынным. Быйыл, “Востоковедение уонна африканистика” секцияҕа үлэм бастакы миэстэни ылла. Онтон Новосибирскайга буолбут VV төгүлүн ыытыллар “МНСК-2017” кэмпириэнсийэҕэ бастакыбын кытынным уонна “Востоковедение” секцияҕа үһүс миэстэни ыллым.

“Ломоносов” уонна “МНСК” аан дойду үрдүнэн биллэр уонна престижнай кэмпириэнсийэлэр буолаллар. Онон хас биирдии кыттааччыга үлэтэ сыаналаммыта бэйэтин итэҕэйэригэр уонна тохтоон хаалбакка өссө да билим үрдүк чыпчаалларын дабайарыгар төһүү буолуо дии саныыбын.

Билим салайааччыбар Л.С. Ефимоваҕа, институппар Г.Г. Торотоевка уонна университетпар Е.И. Михайловаҕа махтанабын! АНАСТАСИЯ АЛЕКСЕЕВА

 Москваҕа олус үчүгэйдик сылдьан кэллибит. Тиийбит күммүтүттэн саҕалаан Москва араас болуоссаттарынан, музейдарынан, библиотекалары кэрийдибит. "Ломоносов" конференцияҕа көхтөөхтүк кытынныбыт, дьүүллүүр сүбэ сэргээтэ аҕай. Москва олус улахан, кыраһыабай куорат эбит. Өссө да бара туруохпун баҕарабын. САРДААНА СЕМЕНОВА

 Муус устар 10-15 күннэригэр Москва куоракка “Ломоносов-2017” кэмпириэнсийэҕэ кыттан кэллибит. Олус элбэх буолан барбыппыт. Үлэм тезиһэ наардааһыны ааһан ыҥырыы сурук тутаммын Филология секциятын “Теория литературы” подсекциятыгар үлэбин иһитиннэрдим. Экспертэр тиэмэбин сэргээбиттэрэ. Ол эрэн, атын өттүттэн киирэн үөрэтэрбэр сүбэлээбиттэрэ. Истээччилэр үлэбин сиһилии, үчүгэйдик өйдүөхтэрин слайда көрдөрөр тэрил суоҕа атахтаабыта. Ол да буоллар, этэҥҥэ кыттан кэлбитим үөрдэр. Өрөспүүбүлүкэ таһыгар ыытыллар кэмпириэнсийэҕэ бастакы кыттыым буолар. Онон элбэҕи билэн, көрөн-истэн, олус бэрт сырыы буолла. Секция үлэтин түмүгүнэн үс үчүгэй үлэни талбыттара уонна барыбытыгар кинигэ бэлэх биэрбиттэрэ. Үөрэнэргэ, сайдарга усулуобуйа баарыгар үөрэнэр кыһабар махтаныах эрэ тустаахпын!  САРГЫЛАНА МАРКОВА

 Мин наукаҕа бастакы хардыыларбын оҥорон эрэр киһи буолабын. “Ломоносов”  конференция5а кыттан кэлбиппиттэн олуһун диэн үөрэбин. Бу конференцияттан элбэх опыты ыллым, атын дойду оҕолоруттан элбэххэ үөрэнним. Наука туһунан элбэҕи бэлиэтэнним. Стимулланным уонна сайдыы бастакы үктэлин дабайдым дии саныыбын. Эһиил баран өссө ситиһиилээхтик кыттыам диэн эрэнэбин. ОЛЬГА ХАЛЫЕВА

 Түгэнинэн туһанан махталбытын тиэрдиэхпитин баҕарабыт тапталлаах үнүстүүппүтүгэр, үнүбэрсиэппитигэр!