Институт языков и культуры народов СВ РФ

 

   Үнүбэрсиэт тэриллибитэ 60 сылыгар аналлаах тэрээһиннэр чэрчилэринэн кулун тутар 29 күнүгэр Арассыыйа Бэдэрээссийэтин Хотугулуу-Илиҥҥи норуоттарын тылларын уонна култуураларын үнүстүүтүн күнэ буолан ааста. Бу күн “Сэргэлээх уоттара” култуура киинигэр үнүстүүт хаапыдыраларын үлэтин, ситиһиилэрин, инники былааннарын көрдөрөр улахан быыстапка тэрилиннэ. Хас биирдии хаапыдыра бэлиэ күҥҥэ элбэх ситиһиилээх, кыайыылаах кэлбитин көрдөрдө уонна сарсыҥҥытыгар эрэллээҕин бигэргэттэ.

   Бэлиэ күн улахан кэнсиэринэн түмүктэннэ. Кэнсиэр иннинэ көрөөччүлэргэ үнүбэрсиэккэ саха тылын уонна литэрэтиирэтин специалистарын бэлэмнээһин историятын сырдатар киинэ көһүннэ. Эҕэрдэ тылы үнүбэрсиэт проректора Н.М. Зайкова, үнүстүүт дириэктэрэ Г.Г. Торотоев уонна өр сылларга үнүстүүтү салайбыт Г.Г. Филиппов эттилэр. Дьоро киэһэни үнүстүүт 4 кууруһун устудьуона, “Мисс молодежь-2016” Надежда Сидорова уонна нууччалыы-сахалыы тылбаас салаатын бүтэрбит, биллэр спортивнай суруналыыс, “Мистер СМИ-2016” өрөспүүбүлүкэтээҕи куонкурус кыайыылааҕа Николай Бястинов киэргэттилэр. Кинилэр билиҥҥи устудьуоннарга ситиһиини баҕардылар, үөрэппит учууталларыгар, үөрэммит кыһаларыгар дириҥ махталларын эттилэр.

   Кэнсиэргэ үнүстүүт устудьуоннара, учууталлара, араас сылларга бүтэрбит выпускниктар – саха эстрадатын ырыаһыттара Чыскыырай, Мирослав Егоров, Кыталы Куо, Кеша Лебедев, цирка, театр артыыстара о.д.а. - кытыннылар. Кэнсиэри Саха көрдөрөр-иһитиннэрэр хампаанньатын эрэдээктэрэ Олег Колесов уонна Саха эстрадатын театрын артыыһа Николай Гоголев ыыттылар. Бу киэһэ саха хомуһа дьүрүһүйдэ, ырыа-тойук дьиэрэйдэ, мустубут дьон олоҥхоттон быһа тардыыны сөҕө-махтайа иһиттэ, оһуохайы оройуттан тутта.